口語化

下晝十二點幾就去個客度開會，過海喎，好彩天氣都算唔錯，唔使熱到想死。係個客度開會，我覺得最傷腦筋係諗下飲d咩好，去政府客度開會有茶紙俾你填想飲d咩。ok ok，我剔咗檸樂。如果你以為茶水阿姐會俾檸檬可樂我咁你就錯啦，係檸底上喎，加大可樂。開會呢家野，雖然我單拖上陣，但係我都好少出聲，又或者咁講，點輪到我出聲丫，我地呢d二打六。所以係會度我唔覺意俾人質左一個問題，我都答到有d呆滯啦，求其答左佢咪係度篤檸檬囉。我覺得大家都係至在吹下水，飲杯野，俾個客兇下，你又拍心口話實幫你搞惦佢，咁咪放你走囉，政府人最興架啦。唔兇你，佢覺得無做過野咁，佢一兇我，我咪唯唯諾諾咁囉，我第日陽奉陰違架。

之後再去另一個客度，都係政府!但呢個客好明顯好相與啦，事關講電話時已經feel到佢係一個nice客。nice客咪就係make sense同明白事理，呢兩樣野好緊要，見到d客又煩又點極唔明就真係好想打佢，唔係講笑。

開完會經過個商場，就行左陣街，度度都final sale，好想好想購物!!作為一個平凡的打工仔，我只係想有穩定的入息，收入足以令我間唔中去下旅行，又或者見到鍾意既野可以諗都唔使諗就買落黎，個種感覺勁好feel。

返到公司半個幾鐘，又執野走去返學。返學返到屋企附近都要辣下更，好想買野呀，買乜都好，我淨係想買野! 結果買左2條褲加1對鞋，本來想買tee，但無心水。返到屋企我先知原來已經十一點! 其實我唔知咁晏，我以為十點鬆d，因為我隻精工表又未入電池 (係，都成一個禮拜既事),電話呢，自從下晝兩點就已經肚餓到暈左，熄埋機啦自動，咁係完全無時間觀念之下，我就盪左成2個幾鐘。無時間觀念度好既，想行街咪行街囉，點行都好，最"驟"忌行街行到興起d鋪頭關門，尋日想去屈神市買少少日用品啦，落半閘囉，無癮!

咁又一日。